雨梅
这是老年人的回忆，往事历历在目，让人了解过去也充满信心走向未来。
伊拉姆妈好人家个出身勿跳广场舞
“好人家”，搿个充满上海趣味个褒义词描述勒当下年轻一代当中已经勿多见了，搿三个字是一定要用上海言话来读个，只有搿能介，再能体味出其中蕴涵个低调搭仔自矜。
所谓好人家，勒沪语个语境里是指生活程度中等、安定、知书达理个规矩人家，大多数踏实本分，正统中庸。好人家个囡儿，有温婉个秉性、良好个教养搭仔实惠却勿乏感性个生活情趣。
伊拉个上一代，可能是真正个淑媛，到了伊拉搿一代，由于时代个变故、现世个急迫，器局勿得勿缩小一圈。伊拉因为勒物质浪见过眼世面，也吃过眼苦头个，勒精神浪向就能够对阅历有所提炼，并可以落实到生活个柴、米、油、盐当中去。伊拉个情绪虽然有得起落，火气却是勿大有了，更加善于搭自家讲和、搭生活周旋。
从年龄浪向来看，伊拉是轻熟女个母亲一代，虽然讲同为职业女性，但更加偏于传统、温儒搭仔家居，擅长用生活个瓶中水，去勾兑出物质搭仔精神层面有所互动个酒，却是触手可得、毫无悬念。伊拉追求个感觉比较贴肉，乐天知命而且随遇而安，相信传奇只是传奇。
伊拉最大个特色是圆融。因为呒没大富贵，所以勿骄，也呒没贫寒，所以勿哀。“温柔而勿妥协，勒安静之中勿慌勿忙个坚强”。上有老、下有小个年纪，周转于职场、家庭个复杂人际关系当中是游刃有余，并且勿忘记去享受人生个乐趣，比如庖厨、旅行、时尚搭仔阅读。
以伊拉个年龄搭仔所经历个时代，日脚绝对算勿上完美个，却始终是尽力而为，甚至对于看似悲剧个人生大局也能够从容以待，既勿厌倦，也勿愤懑。伊拉看多了炎凉，晓得社会浪向个路勿好走，所以要自我松绑搭仔寻找快乐。搭熟女相比，伊拉多了眼秀雅甜蜜，少了眼桀骜逼人。搭伊拉相比呢，熟女则多了清华灵媚，少了絮絮烦琐。
伊拉对生活通常有一个比较具体可行个前瞻，因此，有能力以稳定个心境去应对万变个世态。假使家庭收入是三块洋钿个言话，伊拉是搿能规划个：一块作为家用，一块用来储蓄、以备急用，还有一块呢，就用来交际应酬、娱乐休闲。
伊拉勒拉相夫教子之余，一直邪气努力个保持身为女子个平衡状态，总归是勿自觉个拿时间分成功了三份：一份拨自然，一份拨内心，还有一份就是搭别人相处。做母亲个伊拉，是母亲当中个尖子，做婆婆个伊拉，也勿排除属于隐性难搞型。
好人家个囡儿懂得沉到生活里向去。
伊拉勿大会得去光顾百乐门去跳舞，虽然伊面个弹簧舞池光滑得像镜子，还有得舞技邪气好、头发梳得锃亮、自称“老师”个舞男。但有常时，伊拉倒会得去酒吧听听田果安个老爵士。
伊拉是勿去跳广场舞个，勿会得十日天游览八个国家，也勿会得去着邪气便宜、勿合身个旗袍到处乱窜，或者抖开花花绿绿个丝围巾迎牢仔风拍照，虽然讲，后者看上去邪气生机勃勃，有热情张力，却也是显出了市井泼妇个底板。好人家个囡儿晓得，份寸个缺乏是油腻感个开始。
伊拉个头发做得是邪气精致个，面色也老清爽，眉毛是修过个，但绝对勿会去纹眉搭仔眼线，更加勿会去打玻尿酸。伊拉搨淡颜色个嘴唇膏，着真丝衬衫搭配风衣出去荡马路，一片片梧桐树个叶子落勒伊身浪个辰光，也就有了一刹那间个诗意。
伊拉个胃搭仔胆囊是全球化个，既可以装大饼、油条，又可以装芝士、红酒，可以吃生煎馒头配咖啡，就是拿破仑蛋糕配咖喱牛肉粉丝汤，伊拉也是来三个。伊拉勒吃个上头历来是勿拘一格，而且还孜孜以求，善于勒精微当中显出格局搭仔变化。
一旦进入厨房，伊拉再自谦，也总归会得拿出几只拿手个菜来：五香素鸡、响油鳝丝、黄鱼鲞红烧肉、老鸭扁尖汤、荠菜大馄饨……也会得做几样物事：松茸天妇罗、醉蟹、干巴菌火腿炒饭、海盐奶盖乌龙茶……
伊拉熟练个使用各种生活类个APP，有熟悉个海外代购搭仔冷链海鲜直邮，伊拉用拼多多，伊拉白相烘焙，白相手工制作，吃日本料理，到有好个风景或者是有花园个地方去吃吃下午茶，也会到寺庙里去住个几日天禅修，当然咾，一定侪会发到朋友圈里去个。
伊拉有要好个闺蜜搭仔小有感觉个蓝颜知己讲讲体己言话、做有情调个事体。历尽世事个伊拉内心邪气超脱，人生似甜实苦，好友之间彼此侪具备一颗有共情力个心，再大气点，懂一点，搿个就够了，勿会难为自家去争勒要伊眼捉勿牢个物事搭仔人，也勿会满脑子个去想标准答案。
伊拉欢喜有腔调个人像搭仔静物摄影，偏爱花园洋房、外滩搭仔陆家嘴，虽然讲大多数只必过侪是摆拍。伊拉讲礼数、懂世故、勿招摇，却也希望让大家侪晓得：自家是邪气来三个，伊拉需要眼掌声。
一代一代个好人家个囡儿，就搿能介勒精致搭仔豪爽、感性搭仔理智、自在搭仔纷乱之间，灵活摆渡，伸展自如，直到迟暮。林语堂勒《京华烟云》当中讲得邪气透彻：“从姚思安处，木兰学到个是生命个大道，而莫愁掌握个是世俗个智慧。交关年数以后，我再明白过来，伊个其实应该是一个女子个两面。”
（转载）
