Colours Concept包的第一部金色車是澳門銀河賭場的抽獎禮物，後來包的金色林寶堅尼，照片於網上瘋傳，「土豪金」為車房打響名堂，現時月賺六萬五。最近， Nelson（左上）和 Jessie（右上）也為專門借予客人的 Toyota IQ包上電鍍金色貼紙。
壹盤生意
車房老闆 煉「金」吸客
早前一架金色的林寶堅尼，在中環招搖過市，不少途人拍照放上網瘋傳。只見相中的車身金燦燦，浮誇至極，被稱為「土豪金」！這架矚目的林寶堅尼，屬於「澳門大亨」洪永時，而該位「煉金術師」，是粉嶺車房 Colours Concept的 Nelson（吳正偉）。
Nelson和太太 Jessie曾在老牌上市公司震雄集團做 sales，又試過自立門戶賣機械，但工業式微，收入大減。三年前，愛車的 Nelson從朋友間得知內地流行將不同顏色的薄膜貼紙，覆蓋車身，俗稱「包車」。他因工作認識不少塑膠供應商，正好有門路入貨，決定開展這門生意。
開始時，「包車」只是小圈子玩意， Nelson要買一送一「蝕住做」吸客，每月的客人數目只有幾丁。時勢造英雄，「土豪金」令「包車」流行起來，客人由土豪至港產富豪都有， Nelson的生意額亦拾級而上。就如「煉金術」，當初投放了「堅持」這個重要元素，終於捱出頭來。
「澳門大亨」洪永時早前花了十萬元，把原本紅色的林寶堅尼改成土豪金，在鬧市出沒，「吸睛」指數爆燈，間接為 Nelson宣傳。
位於粉嶺坪輋一條偏僻鄉村內的 Colours Concept，車房外連招牌也沒有。推門進內，只見一架近百萬的黃色保時捷、一架三百多萬的藍色賓利，還有一架四、五百萬元的白色法拉利，貴氣逼人。「係咪估唔到呢個山窿咁多靚車呢？」 Nelson笑說。為了保護名車，他要加強保安，「我請咗個保安幫我睇住，仲加多兩隻洛威拿。」採訪當日，剛巧有客人送來一架白色法拉利，要求轉作銀色啞面。由於客人多數要放低車數天， Nelson早有預備，早花了十萬元買來一架灰色 Toyota IQ車仔，並包成金色，借給客人臨時使用。
功夫要細膩
「包車」正式開始之前，做了十多年車房的同事偉哥，先拆走 bumper、車頭燈之類的配件，然後把車輛洗乾淨，務求一塵不染，「咁貼薄膜貼紙時就唔會凹凸不平。」 Nelson說。「包車」就如替 iPhone貼保護貼一樣，看似簡單，但一不小心，保護貼就會起「卜」、披口。然而，車輛體積大，形狀不一，難度高得多。預備好銀色薄膜貼紙後， Nelson、太太 Jessie、員工偉哥及昌哥四人每人手執薄膜貼一角， Nelson一聲令下便「落貼」，他用肉眼邊觀察，邊指揮道：「偉哥呢邊高啲、阿昌嗰邊低啲。如果唔可以完全攤開薄膜貼紙，就會起褶，唔靚。」 Nelson說。
開工期間， Nelson口中會叼着膠刮，手上執着電風槍。遇上有弧度的地方， Nelson便會輕柔地推着膠刮，將薄膜底下的氣泡推出；遇有皺紋的地方，他便出動電風槍，吹一吹，薄膜馬上變直。鋪好薄膜後， Nelson會用????刀????走多出的薄膜，再將車身邊緣的薄膜，細心地逐條摺入車縫裡收邊。「其實包車好似做手工，唔難，但要細心！」 Nelson邊用????刀邊說。完成後，再由偉哥把 bumper等零件還原。 Nelson平均每兩日便包完一部車，他說：「包完架車後，仲要俾架車曬太陽半日，用太陽嘅熱力令貼紙的膠黐得更實淨！」 Jessie指：「而家每星期大約可以包兩、三架，如果包四架就會辛苦啲囉！」
Nelson將貼紙覆蓋車身後，便會開始修邊，用????刀將貼紙????開，分成一小部分，再逐部分摺入車身裡面。
每部車的零件大小不一，所以每次包車都要度好零件大小，才能裁貼紙。曾從事製衣業負責裁布的昌哥笑指，裁貼紙跟裁布兩者大同小異。
包車用的薄膜貼紙有多種選擇，金銀色、湖水藍、軍綠色都有，但為免責貨， Nelson只會儲存大路顏色如黑、白、灰、紅，其他則因客人需要才訂購。
最貴收十萬
Jessie指來「包車」的客原因五花八門，「有人想高調啲，有人因為車廠無自己心水顏色，有人就信風水。」以往車輛要轉色，多使用噴漆及焗色，但轉色後難回頭，而貼紙包車則隨時可以除脫及變換。 Nelson從比利時的供應商訂購薄膜貼，不同顏色及質地，共有百幾款選擇。 Nelson指與金色相比，其實黑白灰更受歡迎，「有啲係想架車 keep得好啲，新車落地即刻嚟包啞色透明膠！」
一架車的材料費只需七、八千元，最貴是 Nelson收取的手工費，入場費最少兩萬元。「收幾多錢係睇手工難唔難，日本車因為配件較多，要拆又要安番，包起上來比歐洲車貴。」而由他操刀、洪永時的「土豪金」林寶堅尼，由於難度超高，收費達十萬元，「洪先生架車，足足整咗兩個月，佢買埋料過嚟俾我哋包，不過佢隻料特別厚，係一般薄膜嘅三、四倍，柔軟度唔夠，好難轉彎，拼接會多啲。要一路用風槍吹住，屈曲時唔可以太細力，又唔可以太大力，好考經驗。」 Jessie說。 Nelson笑指富豪客幾乎不問價錢，只求質素，「佢哋好少講價，注重你包得幾靚，多過你收幾錢！」
Nelson憶述曾因整花客人的車而賠錢，自此他特別小心，「而家啲車講輕身，鋼水薄咗好多，試過洗洗吓車，洗凹咗架車嘅車頭蓋。」他表示千萬不能「靜靜雞」換過零件「蒙混過關」，「咁樣就乜信譽都無晒，要即刻打俾個客坦坦白白道歉，架車有乜損傷，話晒佢知。之後再同佢哋聯絡廠配番啲零件，維修費由我負責！」他指這行圈子細，有信譽，客人之間就會口耳相傳。湊富豪客，亦要口密：「啲超級富豪都係搵司機揸嚟，佢哋擺明就唔想俾人知係邊個。」他表示六福珠寶太子，某發展商的富二代亦曾幫襯，「但唔開得名！」
Nelson因利成便，將其擁有的四架車全都包上電鍍貼紙，圖中的藍色 Benz已經轉了四次色。他又指，即使是用貼紙包車轉色，也要向運輸署申請改色。
採訪當日， Nelson（右二）正為一架法拉利鋪上銀色啞面貼紙，由於車頭蓋面積大，公司所有人，其太太 Jessie（左二）、昌哥（左一）及偉哥（右一）一同「落貼」。（關永浩攝）
買一送一起家
客人梁金全是風水師，其開篷寶馬本是黑色，他找 Nelson為他改貼磨砂黑色，貪其看起來比原先的光滑面更型。
Nelson和 Jessie早年同在震雄集團打工，負責買賣工業機械，他自言是 top sales。之後，曾自立門戶代理日本的塑膠模具機械，好景時年賺過千萬，但前幾年日圓高企令成本增加，需求亦放緩， Nelson感嘆地說：「工業毛利低，好辛苦做咗幾千萬訂單都係賺幾十萬！」眼見行業前景愈來愈差，二人惟有另覓出路。他們想過搞洗碗工場或除臭生意，但愛車之人的 Nelson說：「有次見到有朋友架車整得幾靚，佢話係用貼紙包，價錢平過噴油，又唔驚唔均勻！原來喺內地整，香港無呢樣嘢，咪試吓囉！」
Jessie邊笑邊說：「我哋初初唔識包，一對車門要搞三個鐘！三個鐘之後，大家你眼望我眼，『唔靚喎！咁點呀？再拆過囉！』然後再踎幾個鐘！」 Nelson和 Jessie出動私伙車練習，包完又拆、拆完再包。他們更出資請比利時的供應商派職員來港，教他們及請來的五名學徒，使用薄膜貼。 Nelson指那時「包車」尚未普及，為了推廣此玩意，他們推出買一送一，即包兩架車才收一架車錢。「頭兩年幾乎無乜收入，使錢開鋪、訂料、生活開支，使咗足足成百萬積蓄。」
當時請的五名學徒已逐一離去，為留人， Nelson曾答應分股份予有潛質的學徒，但對方堅持自立門戶。 Nelson氣憤地說：「我每個月都要花錢養住佢哋，佢哋又達唔到我要求，我不如自己做！」請人難，正是這門生意的困境， Jessie無奈地說：「香港後生仔嫌悶，嫌工時長，我肯教都無人肯入行！」現時， Nelson請來的兩名員工，都是中年人。負責剪裁、洗車的昌哥曾在製衣廠工作；偉哥本來在車房整車，四人日做夜做，熟能生巧，默契漸生， Jessie笑言：「初初兩個禮拜完成一架車，而家兩日就得，差幾遠！」然而，兩人認為包車在內地更流行，故已扑槌下月在深圳南山開分店。
身份象徵
Nelson是車迷，最高峰時期有五架車，包括法拉利、林寶堅尼、 Benz等（現仍有四架），他說：「有啲客麻麻煩煩，嫌三嫌四，我心諗：『唓！我部車仲貴過你啦！』」由老闆變成為車房仔，瞓車底「包車」， Nelson坦言最難放開的是自尊，「啱啱落手落腳包車時，真係好難接受！以前賺錢簽個名就得，而家又要踎低又要瞓低！」採訪期間，他多次問記者：「你覺得我同其他老闆有乜分別？」、「你係咪想像唔到我會揸靚車呀！」他似乎十分重視別人睇法。 Nelson坦言：「有時我真係幾自卑！」為了補償，雖然收入比以前少，但 Nelson也以月租五萬元，租下天巒三千五百呎獨立屋，比以前住得更豪，「做得咁辛苦，梗係想住好啲！」
工作辛苦， Nelson一家三口以月租五萬元，租住天巒三千五百呎獨立屋，慰勞自己。
Nelson重視細節位，遇有車身較低的車，為了看得清楚，每次都會「瞓身」包車。
開業資料（ 12/10）
租金 $75,000#
裝修 $800,000
入貨 $100,000
雜費 $10,000
總投資 $985,000
#兩按一上
營業資料（ 12/14）
營業額 $300,000
租金 $40,000^
人工 $90,000#
入貨 $100,000
雜費 $5,000
盈利 $65,000
^曾搬車房，租金屬自置物業供款
#包兩名全職、兩位老闆及一名保安
撰文：吳敏芳
攝影：林志謙
