啥是上海人？

啥是上海人？

看到小凤凰厄《上海人，外地人》，觉着还是蛮客观厄好文章，虽然俄勒厄观点颇弗相同。同时，望文及义，首先一个问题，啥个叫上海人，以及小凤凰自称厄地道厄上海人?

粗看,该个叫啥问题。有人讲，户口簿上写了，我是上海人。Ok，该算第一层上海人厄定义，户籍上海人。但是该个就有点像US citizen。来勒该沓弗少人，拿了绿卡，入了美籍，也就是因为该沓生活好一点，政治清明一点。当地人也晓得，you are US citizen, you are not American。一旦形势变了，伊拉就会得卷铺盖跑路，弗会更美国共进退。即便来勒美国生活了大半生，黄土到头颈了，还可以宣称一颗中国心，回去混吃混喝，骗骗小姑娘（当然，某媛是弗是小姑娘，此地就弗便鉴定了）。备受某些人推崇厄外地精英，也可类与此。

又有人讲了，我来勒上海土生土长，我是地道厄上海人。该可以算是上海人厄生理论，或者叫physical Shanghainese。但是现在厄小囡，连上海言话侪弗会讲，开口闭口打官腔，北京一招手，伊拉厄魂就跟了跑了。前一晌风光厄上海帮，其实无没一个土生土长厄地道上海人。但是就算调了现在地道厄上海小囡，又哪恁？

闲话讲转来，啥个叫土生土长？来勒上海人口里相，往上数三代，90%以上侪弗是上海土生厄。挺下来10%弗到厄上海土著，享有一个专称：本地人。我内子厄家族可忝列其中。但是我内子弗是上海人，为啥弗是？历史原因，弗便展开。但是伊对我厄启示就是，一个人弗认同上海价值，弗欣赏上海文化，包括上海言话，伊就弗是上海人。（幸运厄是，内子弗通吴语，但是能读懂超语言厄我）。

反之，一个人，弗论伊厄出身、背景，只要伊认同上海，自愿接受并学习上海文化，会得讲上海言话，伊就是上海人。相对拿了上海户口，登了上海Office里相，一口京片子厄所谓外地精英，我更加认可《九十年代初的上海》里相厄苏北新妇。居陋巷，粗衣淡饭，一口苏北上海言话。伊就是上海人！伊厄子女后辈，会成就地道厄上海人。