上海滩一个“外地人”

小辰光，阿拉屋里住辣徐汇区一个工人新村里，基本浪是工人，少数像阿拉爷等另一家研究所格。迭答新村里宁波人交交关关，广东人还勿少，由于工厂个性质，福建人还有相当一部分，其他省市个多多少少，不过越朝北跑越少越往西走还越少，阿拉是四川人，因为四川是个大省而且整个教育程度又比较高，所以还是有几家，而且基本浪还是阿拉爷伊拉研究所格。

远格省份，比方云南贵州好像没有，记得甘肃格倒有一个，是阿拉爷研究所格工程师。

文革前，房管局辣新村里建了一幢房子，解决一些非迭丿厂个住房困难户，阿拉对过楼浪向住进一家贵州人，是辣房管局做木匠格，而且好像还是苗族人，据说手艺勿大灵光，字么还认不得极个，本来房管所就已经基本浪是洋钉木匠了,　迭位爷叔连洋钉木匠都做勿灵醒,　放工后只晓得到外头打大怪路子，技术又勿好，动勿动就寻相骂，好像袖子管一撸就要打相打似格，不过一般人勿大忒伊搞七廿三,　不过看上去打相打大概有点小本事。

有辰光阿拉爷走出去碰着迭只老爷叔，用四川闲话答至伊格贵州闲话轧轧三胡，反正基本浪是一样格，阿拉爷倒从来没问伊老底子是做啥个，不过爷老头子搭伊讲过一两趟闲话后，就搭阿拉讲“迭只赤佬肯定是国民党兵油子出身”。

文化一大革命了，牛鬼蛇神全部揪出来！！阿拉爷当然没逃特，真格迭只贵州老头邦，果然还被揪出来了，罪名清清爽爽像阿拉爷讲格：国民党兵痞！！