用上海闲话改写'上海的风俗习惯' (原载东方网)

假设侬看到一个上海人辣辣早浪厢用开水淘昨日个冷饭头, 用迭样做早饭,  味道嗲得勿得了一样, 谢谢侬勿要看伊勿起, 因为迭个是的的括括个具有上海地方特色个早饭, 为啥? 又省铜钿又省辰光.

辣上海, “荡马路”是相当多个人下班后, 周末双休日脚最流行个白相方式, 为仔啥? 老早是为了屋里地方小, 荡马路又勿用出钞票.

如果一个小青年让小姑娘喊搭去荡马路, 当心点, 小姑娘相中侬了.

走亲戚做人客, 定规要带点物事, 否则说话要太坍台个, 侬一到人家屋里, 总是先要随便讲特几句闲话啥个”有日叫呒没碰着侬了, 身体好伐忙伐”等等, 然后再进屋里作下来, 一般有只把两个陪客, 陪侬讲讲闲话, 解解厌气.

作人客吃饭辰光, 主人家呒没坐下来个辰光, 侬千万勿要动筷子, 等到主人坐下来了, 开始讲”吃啊吃啊”, 那末侬可以吃了. 人客还呒没吃好老酒, 主人家勿会开始吃饭.

吃好仔, 主人家勿会让人客收作碗盏个, 自家弄好后那末摆出香烟水果糖瓜子啥.

人客辣辣个辰光, 主人家勿会骂更勿会打自家小人, 迭样就好像是打骂给人客看个了, 人客呒没走还勿会扫地, 迭样还会让人误会扫地出门了.

人客告辞辰光, 主人家会搭至少送到弄堂口(如果是弄堂说话), 客气点个还会送到车站甚至送到人客上车.

辣上海吃人家结婚酒水辰光, 开始了侬要记牢搭至新郎倌新娘子讲点比如”百年合好”啦”白头到老”之类个好听祝福闲话.

酒水吃特大约摸一半个辰光, 新娘子要换衣裳(一般要换三套), 那末搭至新朗倌一道一桌一桌去敬酒, 新娘子还要特客人点香烟. 才记牢, 迭个辰光作为客人侬一定要大大方方, 勿好推三推四个, 否则新郎新娘屋里人会勿开心个.

上海现在个习惯等已经搭至老底子勿大一样了, 时代变化了, 人还辣辣变, 客套闲话一样会搭跟辣变个, 祖宗个风俗习惯勿一定需要继承下去, 虽然还是有相当一部分人仍旧欣赏老法海派, 讲究排场, 看上去是蛮风光个, 不过呢市面撑过之后算铜钿个辰光发觉空了不少债, 迭个就勿好白相了.

其实真正见过世面个人, 就真个会搭量力而行个.