曉治積曼反口話拍埋下套就唔做狼人

早排曉治積曼話睇完《飛鳥俠》，好感動咁話想做狼人直至過身為止，結果過咗唔夠兩個月就反口。曉治積曼飾演狼人長達15年，現年46歲嘅佢要keep住操到咁fit極唔容易，之不過估唔到佢轉口風轉得咁快 — 最近佢喺Instagram貼出一張狼人鋼爪照，寫住「狼人…最後一次，HJ。」暗示第三集狼人外傳係最後一擊。
對上一次曉治積曼扮演狼人係喺上年《變種特攻：未來同盟戰》，計計吓發現原來《變種特攻》系列正傳、外傳、前傳電影長拍長有，密密添食。下一套《X-Men: Apocalypse》將於2016年5月27日上畫，而狼人外傳第三集亦已預定喺2017年3月3日，即是重有兩次機會睇到佢扮狼人。