海上花列传

第十五回 屠明珠出局公和里 李实夫开灯花雨楼

　　按：黎篆鸿毕竟在那里吃酒？原来便是罗子富的老相好蒋月琴家。李鹤汀先已知道，带着匡二径往东公和里来。匡二抢上前去通报，大姐阿虎接着，打起帘子请进房里。李鹤汀看时，只有四老爷和一个帮闲门客，姓于，号老德的在座。四老爷乃是李鹤汀的嫡堂叔父，名叫李实夫。三人厮见，独有主人黎篆鸿未到。李鹤汀正要动问，于老德先诉说道："篆鸿来哚总办公馆里应酬，月琴也叫仔去哉。俚说教倪三家头先吃起来。"当下叫阿虎喊下去，摆台面，起手巾。适值蒋月琴出局回来，手中拿着四张局票，说道："黎大人来哚来哉，教耐哚多叫两个局，俚四个局末也搭俚去叫。"于老德乃去开局票，知道黎篆鸿高兴，竟自首倡也叫了四个局。李鹤汀只得也叫四个，李实夫不肯助兴，只叫两个。发下局票，然后入席。

　　不多时，黎篆鸿到了，又拉了朱蔼人同来，相让就坐。黎篆鸿叫取局票来，请朱蔼人叫局。朱蔼人叫了林素芬、林翠芬姊妹两个。黎篆鸿说太少，定要叫足四个方罢。又问于老德："耐哚三家头叫仔几花局嗄？"于老德从实说了。黎篆鸿向李实夫一看道："耐啥也叫两个局哚。难为耐哉啘，要六块洋钱哚 ，荒荒唐唐！"李实夫不好意思，也讪笑道："我无处去叫哉啘。"黎篆鸿道："耐也算是老白相啘，故歇叫个局就无拨哉。说出闲话来阿要无志气！"李实夫道："从前相好年纪忒大哉，叫得来做啥？"黎篆鸿道："耐阿晓得？勿会白相末白相小，会白相倒要白相老；越是老末越是有白相。"李鹤汀听说，即道："我倒想着一个来里哉。"黎篆鸿遂叫送过笔砚去，请李鹤汀替李实夫写局票。李实夫留心去看，见李鹤汀写的是屠明珠，踌躇道："俚光景勿见得出局哉 。"李鹤汀道："倪去叫，俚阿好意思勿来。"黎篆鸿拿局票来看，见李实夫仍只叫得三个局，乃皱眉道："我看耐要几花洋钱来放来哚箱子里做啥，阿是我面浪来做人家哉？"又怂恿李鹤汀道："耐再叫一个，也坍坍俚台，看俚阿有啥面孔！"李实夫只是讪笑。李鹤汀道："叫啥人 ？"想了一想，勉强添上个孙素兰。黎篆鸿自己复想起两个局来，也叫于老德添上，一并发下。

　　这一席原是双台，把两只方桌拼着摆的。宾主止有五位，座间宽绰得很，因此黎篆鸿叫倌人都靠台面与客人并坐。及至后来坐不下了，方排列在背后。总共廿二个倌人，连廿二个娘姨、大姐，密密层层挤了一屋子。于老德挨次数去，惟屠明珠未到。蒋月琴问："阿要去催？"李实夫忙说："覅催，俚就勿来也无啥。"李鹤汀回头见孙素兰坐在身傍，因说道："借光耐绷绷场面。"孙素兰微笑道："覅客气，耐也是照应倪啘。"杨媛媛和孙素兰也问答两句，李鹤汀更自喜欢。林素芬与妹子林翠芬和起琵琶商量合唱，朱蔼人揣度黎篆鸿意思，那里有工夫听曲子，暗暗摇手止住。

　　黎篆鸿自己叫的局倒不理会，却看看这个，说说那个。及至屠明珠姗姗而来，黎篆鸿是认得的，又搭讪着问长问短，一时和屠明珠说起前十年长篇大套的老话来。李实夫凑趣说道："让俚转局过来阿好？"黎篆鸿道："转啥局嗄？耐叫来哚末一样好说说闲话个啘。"李实夫道："价末坐该搭来，说说闲话也近便点。"黎篆鸿再要拦阻，屠明珠早立起身来，挪过坐位，紧靠在黎篆鸿肩下坐了。屠明珠的娘姨鲍二姐见机，随给黎篆鸿装水烟。黎篆鸿吸过一口，倒觉得不好意思的，便做意道："耐覅来瞎巴结装水烟，晚歇四老太爷动仔气，吃起醋来，我老老头打勿过俚啘！"屠明珠格声笑道："黎大人放心。四老太爷要打耐末，我来帮耐末哉。"黎篆鸿也笑道："耐倒看中仔我三块洋钱哉，阿是？"屠明珠道："阿是耐勿舍得三块洋钱，连水烟才覅吃哉？----鲍二姐拿得来，覅拨俚吃！覅难为仔俚三块洋钱，害俚一夜困勿着。"那鲍二姐正装好一筒水烟给黎篆鸿吸，竟被屠明珠伸手接去，却忍不住掩口而笑。黎篆鸿道："耐哚来里欺瞒我老老头，阿怕罪过嗄？要天打个 ！"屠明珠那筒烟正吸在嘴里，几乎呛出来，连忙喷了，笑道："耐哚看黎大人 ，要哭出来哉！哪，就拨耐吃仔筒罢。"随把水烟筒嘴凑到黎篆鸿嘴边。黎篆鸿伸颈张口，一气吸尽，喝声采道："阿唷！鲜得来！"鲍二姐也失笑道："黎大人倒有白相哚。"于老德向屠明珠道："耐也上仔黎大人当水哉！水烟末吃仔，三块洋钱勿着杠 。"黎篆鸿拍手叹道："拨来耐哚说穿仔末，倒勿好意思再吃一筒哉啘！"说的合席笑声不绝。

　　蒋月琴掩在一傍，插不上去，见朱蔼人抽身出席，向榻床躺下吸鸦片烟。蒋月琴趁空，因过去低声问朱蔼人道："阿看见罗老爷？"朱蔼人道："我有三四日勿看见哉。"蒋月琴道："罗老爷倪搭开消仔，勿来哉呀。耐哚阿晓得？"朱蔼人问："为啥？"蒋月琴道："故末也是上海滩浪一桩笑话，为仔黄翠凤勿许俚来，俚勿敢来哉。倪从小来里堂子里做生意，倒勿曾听见歇像罗老爷个客人。"朱蔼人道："阿有价事嗄？"蒋月琴道："俚教汤老爷来开消，汤老爷搭倪说个啘。"朱蔼人道："耐哚阿曾去请俚？"蒋月琴道："倪是随便俚末哉，来也罢勿来也罢。倪搭说勿做末也做仔四五年哚，俚乃多花脾气，倪也摸着点个哉。俚搭黄翠凤来哚要好辰光，倪去请俚也请勿到，倒好像是搭俚打岔，倪索性勿去请。朱老爷耐看来哚，看俚做黄翠凤阿做得到四五年。到个辰光俚原要到倪搭来哉，也用勿着倪去请俚哉。"朱蔼人听言察理，倒觉得蒋月琴很有意思，再要问他底细，只听得台面上连声请朱老爷，朱蔼人只得归席。原来黎篆鸿叫屠明珠打个通关，李实夫、李鹤汀、于老德三人都已打过，挨着朱蔼人豁拳。朱蔼人豁过之后，屠明珠的通关已毕。当下会豁拳的倌人争先出手，请教豁拳，这里也要豁，那里也要豁，一时袖舞钏鸣，灯插花颤，听不清是"五魁""八马"，看不出是"对手""平拳"。闹得黎篆鸿烦躁起来，因叫干稀饭："倪要吃饭哉。"倌人听说吃饭，方才罢休，渐渐各散。惟屠明珠迥不犹人，直等到吃过饭始去。

　　李鹤汀要早些睡，一至席终，和李实夫告辞先走，匡二跟了，径回石路长安客栈。到了房里，李实夫自向床上点灯吸烟。李鹤汀令匡二铺床。实夫诧异，问道："杨媛媛搭啥勿去哉嗄？"鹤汀说："勿去哉。"实夫道："耐覅为仔我来里，倒白相来勿舒齐，耐去末哉啘。"鹤汀道："我昨日一夜天勿曾困，今朝要早点困觉哉。"实夫嘿然半晌，慢慢说道："夷场浪赌是赌勿得个 。耐要赌末，转去到乡下去赌。"鹤汀道："赌是也勿曾赌歇，就来哚堂子里碰仔几场和。"实夫道："碰和是勿好算赌；只要勿赌，覅去闯出啥穷祸来。"鹤汀不便接说下去，竟自宽衣安睡。

　　实夫叫匡二把烟斗里烟灰出了。匡二一面低头挖灰，一面笑问："四老爷叫来哚个老倌人，名字叫啥？"实夫说："叫屠明珠，耐看阿好？"匡二笑而不言。实夫道："啥勿响嗄？勿好末，也说末哉啘。"匡二道："倪看仔无啥好。就不过黎大人末，倒抚牢仔当俚宝贝。四老爷，难下转覅去叫俚哉，落得让拨来黎大人仔罢。"实夫听说，不禁一笑。匡二也笑道："四老爷，耐看俚阿好嗄？门前一路头发末才沓光个哉，嘴里牙齿也剩勿多几个，连面孔才咽仔进去哉。俚搭黎大人来哚说闲话，笑起来阿要难看！一只嘴张开仔，面孔浪皮才牵仔拢去，好象镶仔一埭水浪边。倪倒搭俚有点难为情，也亏俚做得出多花神妖鬼怪！拿面镜子来教俚自家去照照看，阿相像嗄！"实夫大笑道："今朝屠明珠真真倒仔满哉！耐勿晓得，俚名气倒响得野哚，手里也有两万洋钱，推扳点客人还来哚拍俚马屁哉。"匡二道："要是倪做仔客人，就算是屠明珠倒贴末，老实说，勿高兴。倒是黎大人吃酒个场花，阿是叫蒋月琴，倒还老实点。粉也勿曾拍，着仔一件月白竹布衫，头浪一点点勿插啥，年纪比仔屠明珠也差勿多哉 。好是无啥好，不过清清爽爽，倒像是个娘姨。"实夫道："也算耐眼睛光勿推扳。耐说俚像个娘姨，俚是衣裳头面多得来多勿过哉，为此着末也勿着，戴末也勿戴。耐看俚帽子浪一粒包头珠有几花大，要五百块洋钱哚！"匡二道："倒勿懂俚哚陆里来几花洋钱？"实夫道："才是客人去送拨俚哚个啘。就像今夜头一歇歇工夫末，也百把洋钱哉。黎大人是勿要紧，倪末叫冤枉煞哚，两家头难为廿几块。难下转俚要请倪去吃花酒，我勿去，让大少爷一干仔去末哉。"匡二道："四老爷末再要说笑话哉。到仔埭上海白相相，该应用脱两钱。要是无拨末叫无法子，像四老爷，就年势间里多下来用用末也用勿完啘。"实夫道："勿是我做人家，要白相末陆里勿好白相，做啥长三书寓呢？阿是长三书寓名气好听点，真真是铲头客人。"说得匡二格声笑了。不料鹤汀没有睡熟，也在被窝里发笑。实夫听得鹤汀笑，乃道："我说个闲话，耐哚陆里听得进？怪勿得耐要笑起来哉。就像耐杨媛媛，也是挡角色啘，夷场浪倒是有点名气哚。"鹤汀一心要睡，不去接嘴。匡二出毕烟灰，送上烟斗，退出外间。实夫吸足烟瘾，收起烟盘，也就睡了。

　　这李实夫虽说吸烟，却限定每日八点钟起身，倒是李鹤汀早晚无定。那日廿一日，实夫独自一个在房里里吃过午饭，见鹤汀睡得津津有味，并不叫唤，但吩咐匡二："留心伺候，我到花雨楼去。"说罢出门，望四马路而来。相近尚仁里门口，忽听得有人叫声"实翁"。实夫抬头看，是朱蔼人从尚仁里出来，彼此厮见。朱蔼人道："正要来奉邀。今夜头请黎篆翁吃局，就借屠明珠搭摆摆台面，俚房间也宽势点。原是倪五家头。借重光陪，千乞勿却。"实夫道："我谢谢哉，晚歇教舍侄来奉陪。"朱蔼人沉吟道："勿然也勿敢有屈，好像人忒少。阿可以赏光？"实夫不好峻辞，含糊应诺，朱蔼人拱手别去。实夫才往花雨楼，进门登楼，径至第三层顶上看时，恰是上市辰光，外边茶桌，里边烟榻，撑得堂子都满满的。有个堂倌认得实夫，知道他要开灯，当即招呼进去说："空来里哉。"实夫见当中正面榻上烟客在那里会帐洗脸。实夫向下手坐下，等那烟客出去，堂倌收拾干净，然后调过上手来。

　　一转眼间，吃茶的，吸烟的，越发多了，乱烘烘像潮涌一般，那里还有空座儿。并夹着些小买卖，吃的，耍的，杂用的，手里抬着，肩上搭着，胸前揣着，在人丛中钻出钻进兜圈子。实夫皆不在意，但留心要看野鸡。这花雨楼原是打野鸡绝大围场，逐队成群，不计其数，说笑话，寻开心，做出许多丑态。实夫看不入眼，吸了两口烟，盘膝坐起，堂倌送上热手巾，揩过手面，取水烟筒来吸着。只见一只野鸡，约有十六七岁，脸上拍的粉有一搭没一搭。脖子里乌沉沉一层油腻，不知在某年某月积下来的。身穿一件膏荷苏线棉袄，大襟上油透一块，倒变做茶青色了。手中拎的湖色熟罗手帕子，还算新鲜，怕人不看见，一路尽着甩了进来。实夫看了，不觉一笑。那野鸡只道实夫有情于他，一直踅到面前站住，不转睛的看定实夫，只等搭腔上来，便当乘间躺下。谁知恭候多时，毫无意思，没奈何回身要走。却值堂倌跷起一只腿，靠在屏门口照顾烟客，那野鸡遂和堂倌说闲话。不知堂倌说了些甚么，挑拨得那野鸡又是笑，又是骂，又将手帕子望堂倌脸上甩来。堂倌慌忙仰后倒退，猛可里和一个贩洋广京货的顺势一撞，只听得豁琅一声响。众人攒拢去看，早把一盘子零星拉杂的东西撒得满地乱滚。那野鸡见不是事，已一溜烟走了。

　　恰好有两个大姐勾肩搭背趔趄而来，嘴里只顾唏唏哈哈说笑，不提防脚下踹着一面玻镜子。这个急了，提起脚来狠命一挣，挣过去。那个站不稳，也是一脚，把个寒暑表踹得粉碎。谅这等小买卖如何吃亏得起，自然要两个大姐赔偿。两个大姐偏不服道："耐为啥突来哚地浪嗄？"两下里争执一说，几几乎嚷闹起来。堂倌没法，乃喝道："去罢去罢，覅响哉！"两个大姐方咕哝走开。堂倌向身边掏出一角小洋钱给与那小买卖的。小买卖的不敢再说，检点自去。气的堂倌没口子胡咒乱骂。实夫笑而慰藉之，乃止。

　　接着有个老婆子，扶墙摸壁，迤逦近前，挤紧眼睛只瞧烟客，瞧到实夫，见是单挡，竟瞧住了。实夫不解其故，只见老婆子嗫嚅半晌道："阿要去白相相？"实夫方知是拉皮条的，笑置不理。堂倌提着水铫子要来冲茶，憎那老婆子挡在面前，白瞪着眼，咳的一声，吓得老婆子低首无言而去。

　　实夫复吸了两口烟，把象牙烟盒卷得精光。约摸那时有五点钟光景，里外吃客清了好些，连那许多野鸡都不知飞落何处，于是实夫叫堂倌收枪，摸块洋钱照例写票，另加小帐一角。堂倌自去交帐，喊下手打面水来。实夫洗了两把，耸身卓立，整理衣襟，只等取票子来便走。忽然又见一只野鸡款款飞来。兀的竟把实夫魂灵勾住。

　　第十五回终。